Алтынньы ый 5 хонуга  -Учуутал күнэ. Биһиги ,Силээннээх орто оскуолатын  үөрэнээччилэрэ, күндүтук саныыр учууталларбытын  бу үөрүүлээх күннэринэн итиитик-истиҥник эҕэрдэлиэхпитин баҕарабыт .

   Учуутал барахсан биһиэхэ кыһаллан, төһөлөөх элбэхтик  сыратын биэрэн үлэлиирий. Хас күн аайы тэтэрээт бэрэбиэркэлээн, сыана туруоран, былаан оностон, оскуолатыгар  кэлэрий. Үөрэтэр оҕолоругар  истиҥ, амырах сыһыаннаах ,билиини биэрээччи , үтүөҕэ , кэрэҕэ сирдээччи -учуутал барахсан.

Уруй буоллун  , мааны учууталга,

Махтал буоллун, бастыҥ  киһиэхэ.

    Маннык  тылларынан  саҕалаан , биһиги  оҕолортон  Учуутал күнүнэн эҕэрдэлэри ыллыбыт.

     Бэһис кылаас үөрэнээччитэ  Рожина  Золотина     бастакы учууталын Юлия Семеновнаны   эҕэрдэлээтэ,киниэхэ  кытаанах доруобуйаны, үлэтигэр ситиһиини баҕарда .   Алтыс кылаас үөрэнээччитэ Сильвия Аммосова , учууталларын Василий Дмитриевиһи, Юлиана Гавриловнаны учуутал күнүнэн истиҥник эҕэрдэлээтэ.

      Ол курдук 7-с кылаас үөрэнээччилэрэ эмиэ үөрэтэр учууталларын эҕэрдэлээтилэр, үлэлэригэр ситиһиини баҕардылар. Ахсыс кылаас үөрэнээччитэ Доланова Иванна : учууталларын бу үөрүүлээх күннэринэн, истиҥник эҕэрдэлээн,туох баар бары үчүгэйи,кэрэни, кытаанах доруобуйаны,үлэлэригэр улахан ситиһиилэри баҕарда. Итини тэҥэ, 9-с кылаас үөрэнээччилэрэ Григорьева Полина, Слепцова Айаана учууталларыгар ис сурэхтэн махтаннылар, ситиһиилэри,  кытаанах доруобуйаны ,уһун дьоллоох олоҕу уонна ыстаал курдук кытаанах ньиэрбэни баҕардылар.

     11 кылаас үөрэнээччилэрэ учууталларын эҕэрдэлээн, махтанан бэйэлэрэ оҥорбут  анал блокноттарын, хас биирдии учууталга бэлэх ууннулар, итии- истиҥ тылларын анаатылар. Бу үөрүүлээх күҥҥэ, онус кылаас үөрэнээччитэ Николаева Нарыйаана, 4-с кылаас үөрэнээччитэ Аммосов Александр, маҥнайгы кылаас үөрэнээччитэ Николаев Аскольд учууталларын эҕэрдэлээн, тыыннаах сибэккини  бэлэх  уунан, учууталларын үөрдэн-көтүтэн , махтал тылларын ыллылар.

     Маны тэҥэ, бары кылаас хаһыат таһаардылар уонна акцияҕа “Открытка ветерану педагогического труда”кыттан , хас биирдиилэригэр бэлэхтээтилэр.

 Түмүкпүтүгэр, тапталлаах учууталларбытын  өссө төгүл учуутал күнүнэн истиҥник эҕэрдэлиибит уонна маннык тылларынан эһиэхэ этэбит:

Махтал эйиэхэ күн сырдыкка

Олохпут аартыгын аспыккар,

Махтал  эйиэхэ учууталга

Сүрэҕин сылааһын биэрбиккэр.

 

Ыстатыыйаны бэлэмнээтилэр   “ Эдэр суруналыыс” куруһуок чилэннэрэ.

 

Учуутал күнүгэр ананар